"හිරුණිකා කියන්නේ මගේ ඇඟේ එල්ලිලා දේශපාලනය කරන්න හදන කූඩැල්ලෙක්" යැයි පාර්ලිමේන්තු මන්ත්‍රි දුමින්ද සිල්වා මහතා කොළඹ ප්‍රධාන මහෙස්ත්‍රාත් අධිකරණය ඉදිරිපිටදී මාධ්‍යවේදීන් අමතමින් ඊයේ (08දා) පස්වරුවේ ප්‍රකාශ කෙළේය. තමාට එරෙහිව අධිකරණයේ නඩුවක් තිබෙන බැවින් වැඩිපුර යමක් ප්‍රකාශ කළ නොහැකි බවද දුමින්ද සිල්වා මහතා පැවැසීය. භාරත ලක්‍ෂ්මන් ප්‍රේමචන්ද්‍ර ඝාතන නඩු විභාගය නිමවී අධිකරණයෙන් පිටවී යන අවස්ථාවේදී එහි රැස්ව සිටි මාධ්‍යවේදීන් අමතමින් දුමින්ද සිල්වා මහතා එසේ ප්‍රකාශ කෙළේය.මෙම නඩුව කැඳවන අවස්ථාවේදී අධිකරණය හමුවේ පෙනී සිටින බව ප්‍රකාශ කළ හිරුණිකා ප්‍රේමචන්ද්‍ර මෙනවිය ඊයේ (08දා) අවස්ථා 2කදී අධිකරණය තුළට පැමිණියද, පාර්ලිමේන්තු මන්ත්‍රි දුමින්ද සිල්වා පැමිණ නඩුව කැඳවන අවස්ථාව වන විට
ඇය අධිකරණය තුළ දක්නට නොවීය.
ඒ පිළිබඳ "මව්බිම" ඊයේ (08දා) පස්වරුවේ හිරුණිකා ප්‍රේමචන්ද්‍ර මෙනවියගෙන් කළ විමසීමකදී ඇය සඳහන් කෙළේ නඩුව කැඳවන අවස්ථාවේදී අධිකරණය හමුවට පැමිණීමට බලාපොරොත්තුවෙන් සිටියද නීති විද්‍යාලයේ විභාගය නිසා අධිකරණයට පැමිණීමට තමන්ට නොහැකි වූ බවයි. තමාට "කූඩැල්ලා" යැයි චෝදනා කළ විත්තිකාර දුමින්ද සිල්වා මහතාට පිළිතුරු ලබාදීමට සූදානමින් සිටින බවද හිරුණිකා ප්‍රේමචන්ද්‍ර මෙනවිය වැඩිදුරටත් පැවැසුවාය. මෙම නඩුවේ පැමිණිල්ලේ පළමු සාක්‍ෂිකරුවන් 10 දෙනාටම ජූලි 02 වැනි දින අධිකරණය හමුවේ පෙනී සිටින ලෙස දන්වමින් අතිරේක මහෙස්ත්‍රාත්වරයා සිතාසි නිකුත් කෙළේය.