කුරුණෑගල පොලිසිය පවසන ආතකාරයට පෙරේදා (30) සවස දෙකට පමණ පුද්ගලයකු කුරුණෑගල පොලිස් අපරාධ විමර්ශන අංශය වෙත බෑගයක බහාලූ මිනිස් අතක කොටසක් ගෙනැවිත් පිහියක් සමග භාරදී කියා ඇත්තේ "මේ තියෙන්නෙ මගෙ ගෑනිගෙ අත ඒ ගෑනි පිට යනව.. මේ මං එයාට දීපු දඬුවම.. කැමති දෙයක් උඹලා මටත් කරපල්ලා" යනුවෙනි.
මෙයින් විශ්මයට පත් පොලිස් නිලධාරීන් වහාම ඔහුගෙන් බිරිය සිටින ස්ථානය දැනගෙන ඇය රෝහල් ගත කරන්නට පියවර ගත් අතර බෑගයේ තිබුණ අත් කොටසද රෝහල වෙත යවා ඇත.
එම කාන්තාව කොළඹ ජාතික රෝහල වෙත මාරු කර යවා ඇත. ඇය තවම ප්‍රතිකාර ගනිමින් පවතින බව මිස ඇගේ තත්වය ගැන තවම තොරතුරු වාර්තා නොවේ.
කුරුණෑගල වැවරවුම, බමුණුගෙදර ප්‍රදේශයේ පදිංචි 29 හැවිරිදි අයකු මේ ආකාරයට තම බිරිඳගේ අත කපා ඇත්තේ අනියම් සබඳතාවක් අතට අසුවීමෙන් බව කියැවෙයි.
තමා විදෙස්ගතව සිට මෑතකදී මෙරටට පැමිණි බවත් ඒ එනවිට බිරිය වෙනත් අයකු හා සම්බන්ධවී සිටින බව ඉව වැටුණ බවත් කියැවුණා. ඔවුන් මේ නිසා දිගින් දිගටම ආරවුල් සිදුකරගෙන ඇත.
බිරිඳ එදින පෙරවරුවේ විරසක වී නිවසින් පිටව වෙනත් නිවසකට ගොස් සිටි අතර සැකකරු ඇයව කැඳවා යන්නට ගොස් ඇත්තේ බිරිඳගේ මහගෙදර කැඳවාගෙන යන බව කියමිනි. බිරිඳ නැවතී සිටි තැනින් තම යතුරු පැදියේ නංවාගෙන නැවත කැඳවා යන අතර වඳුරාගල, හාල් පාරේ පිහිටි කැළෑ ප්‍රදේශයකට කැඳවාගෙන ගොස් බෑගයේ තිබුණ පිහියක් ගෙන ඇගේ අත වැලමිටට පහළින් කපා දැමීම සිදු කර ඇත.
අත කැපී අසරණවූ ඇය කැලෑවේම සිටියදී ඉතාම අමානුෂික ලෙස ඔහු කැපුණු අත් කොටස බෑගයක දමා පොලිසිය වෙත ගෙනැවිත් තිබුණා.
කුරුණෑගල මූලස්ථාන පොලිසිය හා පොතුහැර පොලිසිය වැඩිදුර පරීක්ෂණ පවත්වයි.
තොරතුරු - ජානක එස්. බලල්ල
