කැලණිය ශී‍්‍ර.ල.නි.ප. කාන්තා සංවිධානයේ සභාපතිනි දමයන්ති පෙරේරා මහත්මිය අදහස් දක්වමින් මෙසේ පැවසුවාය.
‘මර්වින් සිල්වා ඇමැතිවරයා ඉතාමත් හොඳ කෙනෙක් වගේම ඉතාමත් දක්ෂ ඇමැතිවරයෙක්. එතුමා සැමවිට අපට උපදෙස් දෙන්නේත් බුදු දහමේ යහපත් කරුණු සමගයි. ඔහු මිනිස් ඝාතකයෙක් නොවෙයි. මඩවල ඝාතනය සම්බන්ධයෙන් ඇමැතිවරයාගේ නම ගාවාගෙන තියෙන්නේ එතුමාගේ විරුද්ධවාදීන්. ඒ අයගේ ද්වේෂ සහගත සිතුවිලි ජනතාව අතරට ගෙනයෑම සඳහායි. අපි මර්වින් ඇමැතිවරයා වෙනුවෙන් පෑනකින් නොව ලේවලින් වුවද පෙත්සම් අස්සන් කර ජනාධිපතිතුමාට ඉදිරිපත් කිරීමට සූදානම්. දැනට කැලණියේ සෑම ප‍්‍රදේශයකම මේ පෙත්සමට අස්සන් ලබා ගන්නවා.’
කැලණිය ප‍්‍රාදේශීය සභාවේ මන්තී‍්‍රවරයෙකු වන එන්.පී. රෝහිත (රාජු) මෙසේ පැවැසීය.
‘මර්වින් ඇමැතිවරයා නැවත කැලණියට අවශ්‍යයි කියන පෙත්සමට දැනටමත් හුනුපිටිය ප‍්‍රදේශයෙන් පමණක් දහසකට වැඩි පිරිසක් අස්සන් තබා තියෙනවා. කැලණියේ සෑම ප‍්‍රදේශයකම මෙවන් පෙත්සම් අස්සන් කිරිමට සිදුවනවා.’
පෑලියගොඩ ප‍්‍රදේශයේ ජනතාවගෙන් එම පෙත්සම සඳහා අස්සන් ලබාගැනීම පෑලියගොඩ නගරාධිපති නිහාල් ආනන්ද මහතාගේ ප‍්‍රධානත්වයෙන් සිදුවන බවත් කීය.